Sirdaryoda Ekopolitsiya xodimi xizmat vaqtida halok bo‘lishi ortidan 3 kishiga jinoyat ishi qo‘zg‘atildi
Sirdaryo daryosida tezkor reyd vaqtida Ekologiya va iqlim o‘zgarishi milliy qo‘mitasi xodimi Mirzo Botirovning halok bo‘lishi yuzasidan 3 nafar shaxsga nisbatan jinoyat ishi qo‘zg‘atildi. Bu haqda Bosh prokuratura matbuot kotibi Portal24.uz’ga ma’lum qildi.
Mirzo Botirov 9-sentabr kuni soat 23:00 atrofida Sirdaryo daryosi o‘zanida o‘tkazilgan tezkor reyd davomida elektr qarmoq yordamida baliq ovlayotgan huquqbuzarlarga duch kelgan. Ularning qarshiligi oqibatida inspektor suvga tushib ketgan.
10-sentabr kuni tegishli tashkilotlar hamkorligida olib borilgan qidiruv ishlari natijasida uning jasadi topilgan.
Bosh prokuratura ma’lumotiga ko‘ra, holat yuzasidan 3 nafar shaxsga nisbatan Jinoyat kodeksining 202-moddasi (hayvonot yoki o‘simlik dunyosidan foydalanish tartibini buzish), 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) hamda 102-moddasi (ehtiyotsizlik orqasidan odam o‘ldirish) bilan jinoyat ishi qo‘zg‘atilgan.
Ular gumon qilinuvchi tariqasida ushlangan. Hozirda dastlabki tergov harakatlari olib borilmoqda.
Ma’lumot uchun, Mirzo Botirov Ekologiya va iqlim o‘zgarishi milliy qo‘mitasi Davlat ekologik nazorat inspeksiyasining Sirdaryo suv havzasini nazorat qilish bo‘limida xizmat qilgan. U vafotidan so‘ng atrof-muhitni muhofaza qilish va ekologik qonunchilik talablarini ta’minlash yo‘lidagi xizmatlari uchun “Tabiat himoyachisi” ko‘krak nishoni bilan taqdirlanadi.
