Shota Rustaveli ko‘chasida “Yashil to‘lqin” yo‘li qurildi, endi harakat vaqti 30 foizga qisqardi
Yo‘l harakatini tashkil etish markazi ma’lumotlariga ko‘ra, yangi tizim evaziga Shota Rustaveli ko‘chasi bo‘ylab harakatlanish vaqti deyarli 30 foizga qisqardi. Test sinovlari ko‘rsatishicha, Janubiy vokzaldan Grand Mir Hotel tomonga yetib borish vaqti avvalgi 11 yarim daqiqadan 8 daqiqaga, qarama-qarshi yo‘nalishda esa 12 daqiqadan 8 yarim daqiqaga tushgan.
Muvozanatlashtirilgan svetoforlar tarmog‘i haydovchilarning qizil chiroqda to‘xtash chastotasini ham keskin kamaytirdi. Har ikki yo‘nalish bo‘ylab harakatlanishda ilgari o‘rtacha 6 marotaba to‘xtash talab etilgan bo‘lsa, endilikda bu ko‘rsatkich 2 taga tushgan. "Yashil to‘lqin" tamoyili belgilangan tezlik tartibiga rioya qilgan holda bir maromda harakatlanayotgan avtomobillar uchun keyingi svetoforlarning yashil chirog‘i ketma-ket yonishini ta’minlaydi.
Ushbu loyiha chorrahalardagi tirbandliklar va kutish vaqtini qisqartirish bilan birga, transport vositalaridan chiquvchi zararli gazlar hamda yonilg‘i sarfini kamaytirishga qaratilgan. Qayd etish joizki, Shota Rustaveli ko‘chasidan avval ushbu intellektual tizim Amir Temur xiyoboni hududida amaliyotga joriy etilgan.
