Shakar miqdori yuqori bo‘lgan salqin ichimliklar qadoqlarida qizil fondagi maxsus ogohlantirishlar paydo bo‘ladi
Yangi tartibga ko‘ra, 2027-yil 1-yanvardan boshlab mahalliy hamda import mahsulotlarining old qismiga tarkibidagi shakar darajasiga qarab alohida rangli yozuvlar tushiriladi. Jumladan, 100 ml ichimlikda 11 grammdan ortiq shakar bo‘lsa, qadoq yuzasining kamida 15 foiz qismini egallaydigan qizil fonda salomatlikka zarar ekani haqidagi ogohlantirish joylashtiriladi. Shuningdek, mahsulot kaloriyasi va kunlik me’yori haqida ma’lumot beruvchi QR-kod bo‘lishi shart qilib belgilanadi.
Nazorat tizimini yo‘lga qo‘yish maqsadida shakar miqdorini aniqlash bo‘yicha yagona laboratoriya metodikasi joriy etilib, har chorakda me’yordan oshgan ichimliklar reyestri e’lon qilib boriladi. Shu bilan birga, 2027-yil oxirigacha monitoring qiluvchi raqamli platforma va Bojxona qo‘mitasi tomonidan import mahsulotlarini elektron deklaratsiyalash tizimi ishga tushiriladi.
Tarkibida shakar miqdori ko‘rsatilmagan yoki tegishli tamg‘aga ega bo‘lmagan ichimliklarni O‘zbekiston hududiga olib kirish hamda ta’lim muassasalari hududida sotish bosqichma-bosqich taqiqlanadi.
