Sariosiyoda yoshlar yetakchilaridan “dolya” talab qilgani aytilayotgan rahbar ustidan surishtiruv boshlandi
Avvalroq Portal24.uz Surxondaryo viloyatining Sariosiyo tumanida yoshlar yetakchilaridan “Open Budget” loyihasi uchun majburiy pul yig‘ilgani, tuman bo‘limi rahbari tomonidan haqoratlar qilingani va ajratilgan mukofot pullaridan “ulush” talab etilgani haqida xabar bergan edi. Soha xodimlari ushbu holat bo‘yicha Yoshlar ishlari agentligi rahbari Alisher Sa’dullayevga bevosita murojaat yo‘llagan edi.
Murojaat ijtimoiy tarmoqlarda keng muhokamalarga sabab bo‘lgach, Sariosiyo tumani hokimligi mazkur voqelikka munosabat bildirdi. Hokimlik axborot xizmatiga ko‘ra, Yoshlar ishlari agentligi tuman bo‘limi rahbarining faoliyati va murojaatda keltirilgan barcha vajlar ayni paytda belgilangan tartibda, xolis va har tomonlama o‘rganilmoqda.
Mas’ullarning ta’kidlashicha, olib borilayotgan surishtiruv va tekshiruv va tekshirish ishlari yakunlangach, aniqlangan qonunbuzilish holatlariga nisbatan qonunchilikda belgilangan choralar ko‘rilishi ta’minlanadi. Holat bo‘yicha batafsil va yakuniy ma’lumotlar o‘rganish natijalariga ko‘ra jamoatchilikka qo‘shimcha ravishda taqdim etilishi rejalashtirilgan.
