Sariosiyo-Termiz poyezdidagi dimiqish va tiqilinch ortidan surishtiruv boshlandi
Ijtimoiy tarmoqlarda Sariosiyo-Termiz yo‘nalishida harakatlanuvchi shahar atrofi poyezdi yo‘laklarida tartibsiz ravishda to‘planib qolgan yo‘lovchilar tasvirlangan videoxabarlar tarqaldi. Guvohlarning ta’kidlashicha, vagonda bolalar, chaqaloqli ayollar va keksalar ko‘pligiga qaramay, havo sovitish tizimi ishlamagan va chidab bo‘lmaydigan darajada dimlik yuzaga kelgan. Ushbu holat yuzasidan “O‘ztemiryo‘lyo‘lovchi” AJ mas’ul mutaxassislari tomonidan rasmiy o‘rganish ishlari yo‘lga qo‘yilgan.
Respublika temiryo‘l ma’muriyatiga ko‘ra, 4 ta vagondan iborat ushbu poyezdda chiptalar o‘rindiq raqamisiz, ya’ni joy ajratilmagan tartibda sotiladi. Har bir vagonga 81 ta o‘rindiq mo‘ljallangan bo‘lib, bayram va dam olish kunlarida yo‘lovchilar oqimi keskin ko‘payishi oqibatida tiqilinch holatlar yuzaga kelishi mumkin. Tashkilot vakillari poyezdlarda sovitish va isitish tizimlari uzluksiz ishlashi belgilanganini aytib, aniqlangan kamchiliklar yuzasidan sifatni yaxshilash choralari ko‘rilishini ma’lum qildi.
Ushbu voqea Surxondaryo viloyati hokimi Ulug‘bek Qosimovning yo‘lovchi tashish tizimidagi achinarli ahvolni keskin qoralaganidan bir necha kun o‘tib yuz berdi. Viloyat rahbari Termizdan Sariosiyoga qatnaydigan poyezdlarda insoniy sharoitlar umuman yo‘qligini, sovitish tizimi ishlamasligi oqibatida yo‘lovchilar manzilga yetgunicha kasallanib qolayotganini ochiq aytgan hamda Transport prokuraturasini jarayonga tomoshabin bo‘lmaslikka chaqirgan.
