Samarqanddagi kuchli toshqin yangi qurilgan temiryo‘l dambasiga shikast yetkazdi
Joriy yilning 3-iyul kuni Samarqand viloyatining Toyloq tumani hududidan o‘tuvchi “Samarqand – Urgut” temiryo‘l uchastkasining ma’lum bir qismiga kuchli suv oqimi urilishi natijasida zarar yetgan. Mazkur favqulodda holat yuzasidan “O‘zbekiston temir yo‘llari” aksiyadorlik jamiyati rasmiy munosabat bildirdi.
Tarqatilgan bayonotga ko‘ra, so‘nggi kunlarda ikki qo‘shni davlat – O‘zbekiston va Tojikistonning tog‘li tizmalarida tinimsiz va kuchli yog‘ingarchiliklar kuzatilgan. Buning oqibatida Zarafshon daryosida suv sarfi odatdagi me’yoriy 80–100 m³/s o‘rniga keskin ko‘tarilib, soniyasiga 300 m³/s gacha yetgan. Suv hajmining bunday shiddatli ortishi daryo qirg‘oqlarini kuchli yuvib ketishiga va ayrim hududlarda daryo o‘zani yo‘nalishining o‘zgarishiga olib kelgan.
Natijada daryo o‘zani temir yo‘lga yaqin bo‘lgan hududlarda 30-40 metrgacha kengayib, poydevor va damba qismiga shikast yetkazgan. Soha mutaxassislarining ta’kidlashicha, Zarafshon daryosida bu kabi og‘ir gidrologik holat so‘nggi 20 yil davomida umuman kuzatilmagan edi.
Ayni paytda temiryo‘l izlari bo‘ylab harakat xavfsizligini ta’minlash va talofat ko‘lamini kamaytirish maqsadida daryo qirg‘oqlarini yirik xarsang toshlar bilan to‘sish va mustahkamlash ishlari tunu kun tashkil etilmoqda.
Favqulodda tiklash ishlariga 15 ta maxsus og‘ir texnika jalb etilgan bo‘lib, hozirga qadar 30 ta dumpkar vagon orqali hududga xarsang toshlar yetkazib berildi. Bundan tashqari, zarur qurilish va mustahkamlash materiallari yuklangan yana 130 ta dumpkar vagon voqea joyiga yo‘naltirilgan. Jamiyat boshqaruvining ma’lum qilishicha, temir yo‘l qatnovini imkon qadar qisqa muddatda to‘liq tiklash hamda poyezdlar harakatining uzluksizligini ta’minlash bo‘yicha barcha zarur tezkor chora-tadbirlar amalga oshirilmoqda.
