Rossiyaga ishlashga ketayotgan O‘zbekiston fuqarolari soni keskin kamayishda davom etmoqda
Markaziy bank hisobotiga ko‘ra, ushbu mamlakatda patent asosida mehnat qilayotganlar soni ham 9,2 foizga kamaygan.
Ushbu davrda mehnat migratsiyasi geografiyasi sezilarli ravishda o‘zgarib, asosiy oqim Yevropa Ittifoqi mamlakatlari, Turkiya, Janubiy Koreya va AQSh kabi muqobil yo‘nalishlarga ko‘chmoqda. Xususan, bir yil ichida Yevropa Ittifoqidagi O‘zbekiston fuqarolari soni 13,2 foizga, Turkiyada 10,7 foizga oshgan bo‘lsa, Janubiy Koreyadagi o‘zbekistonliklar soni 102,2 ming kishiga yetgan.
Regulyatorning ta’kidlashicha, Rossiyaga migrantlar oqimining qisqarishi ichki mehnat bozorida ishchi kuchi taklifini ko‘paytirib, ayrim tarmoqlarda maoshlar o‘sishini sekinlashtirishi mumkin. Shu bilan birga, an’anaviy yo‘nalishdagi migratsiyaning kamayishi xorijdan keladigan pul o‘tkazmalari hajmiga va aholining iste’mol qobiliyatiga o‘z ta’sirini ko‘rsatishi kutilmoqda.
