Rossiyaga ish izlab borayotgan markaziy osiyoliklar kamaymoqda
Nominal ko‘rsatkichlar bo‘yicha eng katta qisqarish O‘zbekiston hissasiga to‘g‘ri kelmoqda. Joriy yilning yanvar-iyun oylarida O‘zbekistondan Rossiyaga ishlash uchun borganlar soni 1,17 million kishini tashkil etib, o‘tgan yilgi ko‘rsatkichdan 13,2 foizga (yarim yilda qariyb 179 ming kishiga) kamaygan.
O‘xshash pasayish Tojikiston (17,9 foizga) va Qirg‘izistonda (16,7 foizga) ham qayd etilgan. Qozog‘istondan kelganlar soni deyarli o‘zgarmagan bo‘lsa, Turkmanistondan boruvchilar 41 foizga oshib, 13,4 ming kishiga yetgan.
Ta’kidlanadiki, rasmiy statistikada o‘ziga xos tafovutlar mavjud. O‘zbekiston Migratsiya agentligi hozirda Rossiyada 834,2 ming o‘zbekistonlik faoliyat yuritayotganini bildirgan bo‘lsa, Rossiya manbalari birinchi yarim yillikning o‘zida kirib kelganlar sonini 1,2 million atrofida ko‘rsatadi.
Bu kabi tafovutlar migrantlarning qolish muddati qisqaligi, bir kishi yil davomida bir necha bor kirib-chiqishi va Rossiya statistikasi mamlakatdan qaytganlarni hisobga olmasligi bilan izohlanadi.
Markaziy osiyolik ishchilarning Rossiya bozorini tark etishi ish sharoitlarining og‘irlashgani, xavfsizlik xatarlarining ortgani hamda muqobil mehnat bozorlarining ommalashayotgani bilan bog‘liq. Qiziqarlisi, mintaqamizdan oqim qisqarayotgan bir paytda, Rossiya mehnat bozorida Hindiston (+54,6 foiz) va Xitoydan (+21,8 foiz) kelgan ishchilar soni keskin ortib bormoqda.
