Rossiyada patent asosida ishlayotgan migrantlarni va ularning daromadlarini nazorat qilish tartibi kuchaytirildi
Unga ko‘ra, jismoniy shaxslar qo‘lida ishlayotgan migrantlar patent olgan kundan boshlab ikki oy muddatda shaxsan yoki “Gosuslugi” portali orqali MVD organlariga xabarnoma topshirishi shart.
Agar migrant yuridik shaxs yoki yakka tartibdagi tadbirkor bilan shartnoma tuzsa, bildirishnoma berish mas’uliyati ish beruvchi zimmasiga tushadi.
Ish beruvchi shartnoma tuzilgan yoki bekor qilingan vaqtdan e’tiboran uch ish kuni ichida MVDni ogohlantirishi lozim. Belgilangan muddat va qoidalarga amal qilmagan kompaniyalarga 400 mingdan 800 ming rublgacha jarima solinishi yoki ularning faoliyati 90 kungacha to‘xtatilishi mumkin.
1-oktyabrdan e’tiboran kuchga kirgan asosiy yangilik esa soliq idoralari va MVD o‘rtasidagi ma’lumot almashinuvi bilan bog‘liq. Endilikda soliq organlari xorijiy xodimlarning daromadlari haqidagi ma’lumotlarni ichki ishlar idoralariga avtomatik ravishda yuboradi va vazirlik ushbu daromadlar qonuniyligini tekshirish mexanizmini ishga tushiradi.
Qayd etish joizki, 2027-yil 1-yanvardan kuchga kiradigan yangi qonunchilikka ko‘ra, yuridik shaxslar va tadbirkorlar qo‘lida ishlayotgan patent egalaridan alohida ikki oylik xabarnoma topshirish talabi bekor qilinadi.
