“Rosatom”dagi moliyaviy inqiroz O‘zbekistondagi AES qurilishini kechiktirishi mumkin
“Rosatom” davlat korporatsiyasi rahbari Aleksey Lixachyovning bildirishicha, noqulay iqtisodiy vaziyat sababli kompaniyaning joriy yildagi investitsiya dasturi deyarli 50 foizga qisqartiriladi. Shuningdek, yaqin 1,5 yil ichida operatsion xarajatlarni 10 foizga kamaytirish rejalashtirilgan.
OilPrice va Eurasianet tahlilchilariga ko‘ra, ushbu moliyaviy cheklovlar “Rosatom” qatnashayotgan xalqaro tashabbuslarga, xususan, O‘zbekiston va Qozog‘istonda barpo etilishi ko‘zda tutilgan AES qurilishlariga salbiy ta’sir ko‘rsatishi mumkin.
“Biz bir qancha loyihalardan darhol voz kechdik yoki ularni amalga oshirish muddatlarini keyinroqqa surdik. Bunda bir nechta mezonlarga, birinchi navbatda, 2030-yilgacha bo‘lgan istiqboldagi samaradorlikka, ya’ni investitsiya qilingan har bir rubldan ko‘proq foyda va daromad olishga tayanildi”, deya Lixachyovning so‘zlaridan iqtibos keltirgan Reuters axborot agentligi.
Yuzaga kelayotgan xatarlar fonida mintaqa mamlakatlari sohada muqobil hamkorlarni izlamoqda. Xususan, Pekin va Vashington bilan hamkorlik imkoniyatlari ko‘rib chiqilmoqda.
Mutaxassislarning ta’kidlashicha, bu “Rosatom” bilan aloqalarni uzishni anglatmaydi, balki ehtimoliy risklarni kamaytirishga qaratilgan harakatdir.
