Reklamani yashirib joylagan 20 dan ortiq bloger va kanal administratori jazolandi
Raqobatni rivojlantirish va iste’molchilar huquqlarini himoya qilish qo‘mitasi ommaviy axborot vositalari, tarmoq administratorlari, blogerlar hamda vaynerlarga tijorat xarakteridagi materiallarni tarqatishda amaldagi tartiblarga qat’iy amal qilish shartligini eslatib o‘tdi.
Amaldagi “Reklama to‘g‘risida”gi qonunga muvofiq, har qanday tovar yoki xizmatga qiziqish uyg‘otishni ko‘zlagan barcha turdagi axborotlar va tijorat maqsadi bo‘lgan sharhlar reklama hisoblanadi.
Belgilangan qoidalarga ko‘ra, bunday kontentlar umumiy axborot oqimidan ajratilgan holda “reklama” yoki “reklama huquqi asosida” degan maxsus belgi bilan aniq ko‘rsatilishi shart. Ta’kidlanishicha, so‘nggi paytlarda ijtimoiy tarmoqlarda ushbu talablarga amal qilmasdan, tijorat postlarini oddiy xabar yoki shaxsiy tavsiya sifatida yashirin joylashtirish holatlari ko‘paygan.
Qo‘mita ma’lumotlariga ko‘ra, qonunbuzarliklarga yo‘l qo‘ygani uchun shu kunga qadar 20 dan ortiq tarmoq faollari va sahifa yurituvchilariga nisbatan tegishli ta’sir choralari qo‘llanilgan. Nazorat organi kelgusida ham reklama belgisisiz tijorat materiallarini tarqatgan shaxslarga nisbatan qonuniy choralar ko‘rilishini ogohlantirmoqda.
