Qozog‘istonda odamlarga juma kunlari bepul non tarqatib kelgan o‘zbekistonlik erkak pichoqlab o‘ldirildi
Qozog‘istonda 35 yoshli O‘zbekiston fuqarosi non sotiladigan shoxobchada pichoqlab o‘ldirildi. Bu haqda KTK telekekanali xabar berdi.
Ma’lum qilindiki, erkak so‘nggi besh yil davomida tandir non sotiladigan shoxobchada ishlagan. Voqea mijoz bilan yuzaga kelgan janjal ortidan sodir bo‘lgan.
Guvohlarning aytishicha, dastlab erkaklar o‘rtasida og‘zaki tortishuv yuzaga kelgan. Mojaro tez orada mushtlashuvga aylangan. Shundan so‘ng 56 yoshli gumondor pichoq olib, 35 yoshli erkakka ko‘krak qismiga ikki marta zarba bergan. Jabrlanuvchi voqea joyida vafot etgan.
Mahalliy aholi marhumni ijobiy inson sifatida eslamoqda. U hech kim bilan janjallashmagani, hatto juma kunlari odamlarga bepul non tarqatgani aytilmoqda.
Olmaota viloyati politsiya departamenti ma’lumotiga ko‘ra, mazkur holat yuzasidan qotillik moddasi bilan jinoyat ishi qo‘zg‘atilgan va tezkor-qidiruv ketmoqda. Gumondor hibsda va o‘z aybini tan olgani bildirilgan.
