Qozog‘iston O‘zbekiston va yana 10 ta mamlakat bilan transchegaraviy QR to‘lovlarni yo‘lga qo‘ymoqda
“Central Asia FinTech Summit” tadbirida Qozog‘iston Milliy banki raisi o‘rinbosari Binur Jalenov ma’lum qilishicha, mamlakat xalqaro QR-to‘lovlar tizimini joriy etish bo‘yicha O‘zbekiston, Xitoy, Hindiston, BAA va Qirg‘iziston kabi 11 ta davlat bilan faol muzokaralar olib bormoqda. Loyiha doirasida Xitoy yo‘nalishidagi mexanizmni joriy yil yakuniga qadar, boshqa hamkor mamlakatlar bilan esa kelgusi yilning o‘rtalarigacha bosqichma-bosqich ishga tushirish ko‘zda tutilgan.
Yangi tizimning ishlash tamoyiliga ko‘ra, fuqarolar xorijiy davlatlarda xaridlarni amalga oshirishda mahalliy bank ilovalari orqali xorijiy QR kodlarni skanerlaydi va to‘lov zudlik bilan bajariladi. Ushbu qulaylik O‘zbekiston va boshqa hamkor davlatlar fuqarolari Qozog‘istonga tashrif buyurganida ham birdek amal qiladi.
Transchegaraviy operatsiyalar uchun undiriladigan komissiya miqdori tijorat banklarining o‘zlari tomonidan mustaqil ravishda belgilanadi. Qozog‘iston Milliy banki xizmat haqini markazlashgan holda tartibga solmaydi va uni tijorat banklari ixtiyoriga qoldiradi.
