Qimorni targ‘ib qilgan 50 dan ortiq sayt bloklandi, noqonuniy reklama tarqatgan 3 blogerga chora ko‘rildi
Monopoliyaga qarshi organ o‘tgan olti oy davomida sohadagi axborot makonini tozalash doirasida 76 ta veb-saytga nisbatan ta’sir choralarini ko‘rish uchun vakolatli idoralarga murojaat yuborgan. Monitoring natijalariga ko‘ra, bloklangan saytlardan tashqari, ijtimoiy tarmoqlardagi auditoriyasiga bukmekerlik xizmatlarini video-roliklar va sahna ko‘rinishlari orqali targ‘ib qilgan uch nafar taniqli blogerga nisbatan ma’muriy bayonnomalar rasmiylashtirilgan.
Reklama to‘g‘risida"gi qonunchilikka ko‘ra, internet va telekommunikatsiya tarmoqlari orqali qimor va tavakkalchilikka asoslangan har qanday o‘yinlarni targ‘ib qilish qat’iyan man etiladi.
Tekshiruvlar faqat internet tarmog‘i bilan cheklanmay, jami 13,5 mingdan ziyod reklama materiallari atrofida olib borilgan.. Shundan 6 mingga yaqin holatda turli huquqbuzarliklar aniqlangan. Xususan, tamaki, spirtli ichimliklar va taqiqlangan mahsulotlar reklamasi bo‘yicha 54 ta, noqonuniy dori vositalari hamda biologik faol qo‘shimchalar (BFQ) targ‘iboti bo‘yicha 51 ta va bukmekerlikka oid 82 ta noqonuniy holat qayd etildi. Umuman olganda, 83 ta subyektga nisbatan operativ ta’sir choralari qo‘llanilgan.
Nazorat organlari o‘tkazgan ekspertiza va tahlillar shuni ko‘rsatdiki, mamlakatdagi 18 mingdan ortiq reklama materiallarining qariyb 25 foizi amaldagi qonun talablariga javob bermaydi. Nazorat tadbirlari davomida ayrim kompaniyalar dori vositalari reklamasida milliy va oilaviy qadriyatlarga, jamiyatda umumqabul qilingan axloq mezonlariga zid ibora va obrazlardan foydalangani ma’lum bo‘lgan.
Tegishli davlat organining rasmiy xulosasiga ko‘ra, ushbu roliklar axloqsiz deb topilgan. Qo‘mita qonunbuzilishlarning oldini olish maqsadida OAV, sayt adminlari va reklama beruvchilarga yil davomida 10 mingga yaqin rasmiy ogohlantirish hamda so‘rovlar yuborgan.
