Qashqadaryoda maktab direktori 500 dollar pora olgani uchun 5 yilga ozodlikdan mahrum qilindi
Qashqadaryo viloyati Mirishkor tumanidagi maktab direktoriga o‘qituvchini ishga qabul qilish evaziga 500 AQSH dollari talab qilib, 6 million so‘m olganlikda ayblov hukmi chiqarildi. Sud unga 5 yil muddatga ozodlikdan mahrum qilish jazosini tayinladi. Bu haqda Oliy sud axborot xizmati Portal24.uz jurnalistiga ma'lumot berdi.
Jinoyat ishlari bo‘yicha Mirishkor tuman sudining 2026-yil 23-iyundagi hukmiga ko‘ra, umumiy o‘rta ta’lim maktabi direktori fuqaroni fizika fani o‘qituvchisi lavozimiga ishga qabul qilish hamda kelgusidagi mehnat faoliyatiga rahnamolik qilish evaziga 500 AQSH dollari berishni talab qilgan.
Ma'lum qilindiki, davlat universiteti talabasi 2026-yil aprel oyida Mirishkor tumanidagi maktablarda ish izlagan. Suhbat davomida direktor undan ishga qabul qilish evaziga 500 AQSH dollari talab qilgan.
Talaba ushbu holat yuzasidan huquqni muhofaza qiluvchi organlarga ariza bergan. Shundan so‘ng Iqtisodiy jinoyatlarga qarshi kurashish departamenti tomonidan tezkor tadbir o‘tkazilib, maxsus kimyoviy ishlov berilgan 6 million so‘m arizachiga topshirilgan.
2026-yil 23-aprel kuni arizachi maktab direktorining xizmat xonasida kelishilgan 6 million so‘mni bergan. Sud hujjatlariga ko‘ra, direktor pulni olganidan so‘ng tezkor tadbir ishtirokchilarini ko‘rib qochishga uringan hamda pullarni maktab hududidagi beda orasiga uloqtirgan. Keyinchalik u ushlanib, pullar topib olingan.
Sudga oid kimyoviy ekspertiza xulosasida pullarda maxsus kimyoviy kukun izlari va "Pora-2026" yozuvi mavjudligi, direktorning qo‘llaridan olingan surtmalarda ham xuddi shu modda aniqlangani qayd etilgan.
Sud majlisida audio va videoyozuvlar, ekspertiza xulosalari hamda guvohlarning ko‘rsatmalari tekshirildi. Sudlanuvchi aybiga qisman iqror bo‘lib, pulni qo‘shimcha dars soatlari bilan bog‘liq ravishda olganini bildirgan. Biroq sud ushbu vajni ish materiallari bilan tasdiqlanmagani sababli rad etdi.
Sud ayblanuvchini Jinoyat kodeksining 210-moddasi 2-qismi "v" bandi bilan aybdor deb topdi. Unga 5 yil muddatga ozodlikdan mahrum qilish, shuningdek, 2 yil davomida davlat ishtirokidagi korxona, tashkilot va muassasalarda mansabdorlik lavozimlarida ishlash huquqidan mahrum etish jazosi tayinlandi. Jazo umumiy tartibli koloniyada o‘talishi belgilandi.
Shuningdek, tezkor tadbirda foydalanilgan 6 million so‘m Iqtisodiy jinoyatlarga qarshi kurashish departamentining Qashqadaryo viloyati boshqarmasi maxsus fondiga qaytarildi.
