Qarshi davlat texnika universitetining tomi yonib ketdi
Qashqadaryo viloyati Qarshi davlat texnika universitetining bosh binosida 14-sentabr kuni yong‘in sodir bo‘ldi. Bu haqda Favqulodda vaziyatlar vazirligi xabar qildi.
Qashqadaryo viloyati Favqulodda vaziyatlar boshqarmasi ma’lumotiga ko‘ra, soat 14:53 da “112” tizimiga universitet bosh binosining tom qismida yong‘in yuz bergani haqida xabar kelib tushgan.
Chaqiruv asosida qutqaruv bo‘linmalari voqea joyiga yetib borib, yong‘inni o‘chirish ishlarini olib borgan. Yong‘in soat 15:57 da to‘liq o‘chirilgan.
Dastlabki ma’lumotlarga ko‘ra, hodisa oqibatida tan jarohati olganlar yo‘q. Yong‘inning kelib chiqish sababi hozircha ma’lum qilinmagan.
