Prezident poytaxtning Olmazor tumanidagi minorali avtoturargohni borib ko‘rdi
Prezident Shavkat Mirziyoyev 11-sentyabr kuni Toshkent shahrining Olmazor tumanidagi Qichqiriq mahallasida amalga oshirilgan obodonlashtirish ishlari bilan tanishdi. Davlat rahbari hududda respublikada birinchilardan bo‘lib o‘rnatilgan, 16 ta avtomobilga mo‘ljallangan 8 qavatli minorali avtoturargohni ham ko‘zdan kechirdi.
Minorali avtoturargoh lift prinsipi asosida ishlaydi. Markaziy lift avtomobilni qabul qilib, uni avtomatik tarzda o‘ng yoki chap tomondagi bo‘sh joyga joylashtiradi. Shu tariqa odatda bir juft avtomobil sig‘adigan kichik maydonda 16 ta mashinani saqlash imkoniyati yaratilgan.
Prezident tashrifi davomida Qichqiriq mahallasidagi boshqa yangilanishlar bilan ham tanishdi. “Obod mahalla” davlat dasturi doirasida hududni obodonlashtirish uchun mahalliy budjetdan 71,4 mlrd so‘m yo‘naltirilgan. Qichqiriq kanali bo‘yida 2,4 kilometrlik sayilgoh tashkil etilib, piyodalar yo‘laklari, yashil hududlar, shiyponlar, favvoralar, sport maydonchalari va amfiteatr barpo etilgan.
Shuningdek, davlat rahbari mahalladagi 441-sonli davlat maktabgacha ta’lim tashkilotida yaratilgan sharoitlarni ko‘zdan kechirdi. Bog‘chada 450 o‘rinli ikkita yangi bino qurilib, uning umumiy sig‘imi 835 o‘ringa yetkazilgan. Muassasada tuz xonasi, ingliz tili, mental arifmetika, musiqa, shaxmat, taekvondo va boshqa yo‘nalishlardagi to‘garaklar tashkil etilgan.
Prezident bog‘chadagi yo‘l harakati xavfsizligi to‘garagi faoliyati bilan ham tanishib, bunday mashg‘ulotlarni boshqa maktabgacha ta’lim muassasalarida ham ommalashtirish muhimligini ta’kidladi.
