Poytaxtda maktab avtobuslari yo‘lga qo‘yilishi mumkin. Toshkentliklar o‘rtasida so‘rovnoma boshlandi
Loyihani amaliyotga tatbiq etishdan avval ota-onalar hamda o‘quvchilarning real ehtiyojlarini o‘rganish maqsadida maxsus so‘rovnoma ishga tushirildi. Unda aholidan yashash joyi, farzandining maktabi va sinfi, uydan chiqish vaqti hamda hozirda foydalanilayotgan transport turi kabi muhim ma’lumotlarni ko‘rsatish so‘ralmoqda.
Ushbu so‘rov jarayonida ishtirok etish uchun maxsus Telegram-bot faoliyati yo‘lga qo‘yilgan.
E’tiborlisi, agar bir oilada bir nechta maktab yoshidagi farzand bo‘lsa, so‘rovnomada har bir o‘quvchi uchun alohida ma’lumot kiritilishi talab etiladi.
So‘rovnoma yakunlangach, Yo‘l harakatini tashkil etish markazi mutaxassislari to‘plangan ma’lumotlarni tahlil qiladi. Natijalar poytaxtda maktab avtobuslari tizimini qay darajada va qaysi yo‘nalishlarda joriy etish masalasini hal qilishda asosiy mezon bo‘lib xizmat qiladi.
