Portal24 o‘rganishi ortidan Surxondaryoda xodimni ta’tilda majburan ishlatgan muassasa rahbari javobgarlikka tortildi
Avvalroq Portal24.uz tahririyatiga Surxondaryo viloyati Uzun tumani Suv yetkazib berish xizmati davlat muassasasining yangi tayinlangan direktori A. Abdusattorov ustidan murojaat va audioyozuv kelib tushgan edi.
Mehnat inspeksiyasi tomonidan o‘tkazilgan tekshiruv davomida mehnat qonunchiligi buzilgani va qonuniy ta’tilda bo‘lgan xodim uning xohish-irodasiga zid ravishda majburiy ravishda ishga jalb etilgani va unga nisbatan tahdidli munosabatda bo‘lingani o‘z tasdig‘ini topdi.
Majburiy mehnatga yo‘l qo‘yilgani sababli muassasa rahbariga nisbatan O‘zbekiston Respublikasi Ma’muriy javobgarlik to‘g‘risidagi kodeksining 51-moddasiga (Mehnatga ma’muriy tarzda majburlash) asosan ma’muriy jarima qo‘llanilgan.
Inspeksiya ta’kidlaydiki, majburiy mehnatga yo‘l qo‘yish qonunbuzilish hisoblanadi. Xodimning mehnat huquqlariga rioya qilish hamda uning sha’ni va qadr-qimmatini hurmat qilish har bir ish beruvchi uchun majburiydir.
Davlat mehnat inspeksiyasi fuqarolarning mehnat huquqlari himoyada ekanligini bildirdi.
