O‘zbekistonliklar banklarga ishonishni boshladimi? Depozitlar 122 trillion so‘mga ko‘paydi
O‘zbekiston banklarida fuqarolar hamda korxonalarning jamg‘armalari keskin ortgani kuzatildi. Bir yil muqaddam ushbu ko‘rsatkich 360,4 trillion so‘mni tashkil etgan bo‘lsa, o‘tgan davr mobaynida banklardagi depozitlar summasi 122,3 trillion so‘mga ko‘paygan. Depozitlar o‘sish sur’atining kreditlarga qaraganda tezroq yuqorilayotgani bank tizimining ichki moliyaviy resurslar bazasi mustahkamlanayotganidan dalolat beradi.
Shu bilan birga, bank tizimining umumiy aktivlari yillik hisobda 19 foizga oshib, 1 016,6 trillion so‘mlik marrani zabt etdi. Tijorat banklarining jami kapitali ham xuddi shunday dinamika ko‘rsatib, 127 trillion so‘mdan 150,6 trillion so‘mga yetgan hamda 19 foizlik o‘sishni qayd etgan.
Iqtisodiyotning real sektorini moliyalashtirish ham izchil davom etmoqda. O‘tgan bir yil davomida banklarning kredit ajratmalari hajmi 12 foizga ko‘payib, 576,2 trillion so‘mdan 644,6 trillion so‘mga yetdi. Shu tariqa, bir yil ichida iqtisodiyot hamda turli loyihalarga yo‘naltirilgan qo‘shimcha kreditlar miqdori 68,4 trillion so‘mni tashkil qildi.
