O‘zbekistondagi ikki nomsiz cho‘qqiga “Muzqoya” va “Qirqqiz” nomlari berildi

Yangi nom berilgan Muzqoya cho‘qqisi Oʻzbekiston va Tojikiston chegarasida, Hisor togʻ tizmasining shimoliy-sharqida joylashgan bo‘lsa, “Qirqqiz”cho‘qqisi esa Turkiston togʻ tizmasida, Gʻoʻralashsoy va Koʻlsuv soylari oraligʻida joylashgan.

Qaror bilan ayrim geografik obyektlarning boshqa tillarda yoki o‘zgargan shaklda qo‘llanib kelgan nomlari o‘zbek tili me’yorlariga moslashtirildi:

Самoлёт тушди - Maydontogʻ;

пещера Тамерлана - Amir Temur;

Ялантуш - Yalangtoʻsh;

Мачитли - Masjidlitogʻ;

Пыдар - Padar;

Кемпиржол - Kampiryoʻl;

Бургана - Burgantogʻ;

Душак - Qoʻshqoya;

Етимтаг - Yakkatogʻ;

Етимтов - Yetimtogʻ;

Туратау - Toʻratogʻ;

Гўрдара - Goʻrdara;

Темир Капиг (Илонўтди) - Temirqapugʻ ;

Янгак - Yongʻoqli.

“Bir necha yillar davomida bu choʻqqi Nomsiz choʻqqi deb atalgan. Juda koʻp nomlar taklif qilingan, lekin shu paytgacha biron nom ishlatilmagan. Haqiqatdan ham, atrofi toʻliq muz bilan qoplangan. Shuning uchun Muzqoya choʻqqisi deb nom berildi”, — deydi Hisor davlat qo‘riqxonasi boshlig‘i Qahramon Normurodov.

Hisor davlat qo‘riqxonasi 81 ming gektardan ortiq hududni qamrab oladi. Bu yerda balandligi 2500–4387 metr oralig‘idagi o‘nlab cho‘qqilar bor. “Muzqoya” deb nomlangan 4360 metrlik cho‘qqi qo‘riqxonadagi eng baland nuqtalardan biri hisoblanadi.

Qo‘riqxona ma’muriyati hududdagi tabiiy obyektlarni hisobga olib, ulardan 38 tasiga nom berish yuzasidan Vazirlar Mahkamasiga taklif kiritgan.

Shuningdek, Jizzax viloyati Baxmal tumanidagi ilgari nomsiz bo‘lgan tog‘ “Qirqqiz” deb nomlandi. U Turkiston tog‘ tizmasida, G‘o‘ralashsoy va Ko‘lsuv soylari oralig‘ida joylashgan.

Ushbu nomlar hukumatning 2026-yil 9-iyuldagi 376-son qarori bilan tasdiqlangan. Hujjat jami 124 ta tog‘ tizmasi, tog‘, cho‘qqi, dara, dovon va g‘orning nomini davlat tili me’yorlariga moslashtirish hamda ularga yangi nom berishni nazarda tutadi.