O‘zbekistondagi 77 ta chiqindi poligoni investorlarga topshiriladi
Ushbu loyiha orqali poligonlarda chiqindilarni saralash tizimini yo‘lga qo‘yish, ikkilamchi xomashyoni qayta ishlashga yo‘naltirish hajmini keskin oshirish ko‘zda tutilgan. Hududlar kesimida eng ko‘p lotlar Jizzax (11 ta), Xorazm (9 ta), Buxoro va Andijon (8 tadan) viloyatlariga to‘g‘ri kelgan.
Shuningdek, Toshkent, Navoiy, Farg‘ona, Namangan, Surxondaryo, Qashqadaryo, Samarqand, Sirdaryo hamda Qoraqalpog‘istondagi poligonlar ham savdolarga chiqarilgan.
Mazkur chora-tadbirlar davlat rahbarining chiqindilarni saralash va qayta ishlash sohasiga mahalliy hamda xorijiy investorlarni jalb etishga oid tegishli farmonlari ijrosini ta’minlash maqsadida amalga oshirilmoqda. Chiqindi poligonlarini boshqarish direksiyasi tomonidan belgilangan tartibga ko‘ra, loyihada ishtirok etuvchi tadbirkorlar ochiq tanlovlar orqali tanlab olinadi.
Rasmiylarning ta’kidlashicha, saralash tizimining joriy etilishi respublikada chiqindilarni boshqarish samaradorligini oshirish, atrof-muhitga yetkaziladigan salbiy ta’sirni kamaytirish va tabiiy resurslardan oqilona foydalanish imkonini beradi.
