O‘zbekistonda yil boshidan buyon 700 ming nafar aholi kambag‘allikdan chiqdi
Prezident Shavkat Mirziyoyev raisligida kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish masalalariga bag‘ishlangan videoselektor yig‘ilishi boshlandi.
Yil boshida respublikada kambag‘allik darajasi 5,8 foizni tashkil etib, ehtiyojmand aholi soni 2 million 200 ming nafar edi. Hozirda bu ko‘rsatkich 1,5 million nafargacha kamaygan. Shu tariqa, yil boshidan buyon 700 ming nafar aholi kambag‘allikdan chiqqan.
Yig‘ilishda ishni to‘g‘ri tashkil qilgan 49 ta tuman va 3 ming 429 ta mahalla ishsizlik va kambag‘allikdan xoli hududga aylanayotgani qayd etildi.
Biroq qolgan 159 ta tuman va shahar hamda 5 ming 536 ta mahallada mas’ullar faoliyatida natijalar yetarli emasligi tanqid qilindi.
Davlat rahbari barcha hududlarga bir xil vakolat, resurs va imkoniyat berilganini ta’kidlab, mavjud imkoniyatlardan samarali foydalanish, aholi daromadlarini oshirish va kambag‘allikni qisqartirish bo‘yicha ishlarni jadallashtirish zarurligini qayd etdi.
Yig‘ilishda joylarda natija bo‘lmayotganining asosiy sabablari tahlil qilindi.
“Mahalla yettiligi” uchun mas’ul rahbarlar viloyat, tuman, shahar va mahalladagi xodimlarga qabul qilingan qarorlarni qanday ijro etish bo‘yicha aniq ko‘rsatmalar bermayotgani qayd etildi.
Ayrim rahbarlar yaratilgan sharoitlardan to‘g‘ri foydalanish va “yettilik” faoliyatiga xolis baho berishni bilmayotgani ko‘rsatib o‘tildi.
Tuman va mahallada kambag‘allik hamda ishsizlikka mas’ul xodimlarda hadik borligi, hech kim mas’uliyatni o‘z zimmasiga olishni istamayotgani tanqid qilindi.
Kambag‘allikni qisqartirish bo‘yicha 50 yillik tajribaga ega Xitoy ham zamon talabidan kelib chiqib, quyi tizimga doimiy ravishda aniq ko‘rsatmalar berib borishi ta’kidlandi.
– O‘tgan uch yilda mahallalardagi tadbirkorlik loyihalariga 314 trillion so‘m resurs ajratildi. Lekin kreditlarning kambag‘allikni qisqartirishga ta’siri barcha tumanda birdek sezilmayapti,
– dedi davlatimiz rahbari.
