O‘zbekistonda “sukunat vaqti” uzaytirilib, shovqin tartibini buzganlik uchun jarimalar oshiriladi
11-dekabrdan O‘zbekistonda maishiy shovqin bilan bog‘liq qoidabuzarliklar uchun javobgarlik kuchaytiriladi. Yangi tartib bo‘yicha fuqarolarga solinadigan jarima 3,08 mln so‘mgacha, mansabdor shaxslar uchun esa 8,8 mln so‘mgacha yetadi. Shuningdek, me’yordan ortiq shovqin chiqaradigan avtomobillar uchun ham jarima ikki baravar oshiriladi.
Yangi qonun bilan Ma’muriy javobgarlik to‘g‘risidagi kodeksning maishiy shovqinga qarshi kurashish talablarini buzishga oid 192-moddasi qayta ko‘rib chiqildi.
Ayni paytda tungi vaqtda fuqarolarning osoyishtaligi va normal dam olishiga xalaqit berganlik uchun fuqarolarga qariyb 146,5 ming so‘m, mansabdor shaxslarga esa 220 ming so‘mgacha jarima qo‘llanadi.
Yangi tartib kuchga kirgach, bunday qoidabuzarlik uchun fuqarolar 3–5 BHM — 1,32 mln so‘mdan 2,2 mln so‘mgacha, mansabdor shaxslar esa 10–15 BHM — 4,4 mln so‘mdan 6,6 mln so‘mgacha jarimaga tortiladi.
Agar shu qoidabuzarlik bir yil ichida yana takrorlansa, jarima fuqarolar uchun 5–7 BHM — 2,2 mln so‘mdan 3,08 mln so‘mgacha, mansabdor shaxslar uchun 15–20 BHM — 6,6 mln so‘mdan 8,8 mln so‘mgacha oshadi.
Sukunat saqlanishi kerak bo‘lgan vaqt uzaytiriladi
Qonun bilan fuqarolarning osoyishtaligini ta’minlash uchun belgilangan tungi vaqt ham o‘zgarmoqda. Hozir amalda bo‘lgan 23:00 dan 06:00 gacha bo‘lgan vaqt o‘rniga ish kunlari 23:00 dan 07:00 gacha, dam olish va ishlanmaydigan bayram kunlari esa 22:00 dan 09:00 gacha sukunat saqlanishi talab etiladi.
Mazkur vaqtlarda belgilangan me’yordan yuqori shovqin chiqarib, fuqarolarning osoyishtaligi va normal dam olishiga xalaqit berish javobgarlikka sabab bo‘ladi.
Shovqinli avtomobillar uchun jarima ikki baravar ko‘payadi
Transport vositalaridan chiqadigan ortiqcha shovqin uchun ham jazo kuchaytirilmoqda. Hozirda shovqin darajasi belgilangan me’yordan yuqori bo‘lgan avtomobilni boshqarish uchun ogohlantirish yoki 0,5 BHM — 220 ming so‘m jarima nazarda tutilgan.
11-dekabrdan esa ogohlantirish chorasi bekor qilinadi va bunday holat uchun 1 BHM — 440 ming so‘m jarima undiriladi. Shunday qilib, shovqin me’yorini buzgan avtomobillar uchun jarima amaldagiga nisbatan ikki baravar oshadi.
Qonun 11-dekabrdan kuchga kiradi.
