O‘zbekistonda olti oyda 2 146 nafar ayol zo‘ravonlik va tazyiqqa oid ishlarda jabrlanuvchi deb topildi
2026-yilning birinchi yarmida sudlarda ko‘rilgan zo‘ravonlik va tazyiqqa oid jinoyat ishlari bo‘yicha 2 146 nafar ayol jabrlanuvchi deb topilgan. Ularning 581 nafari voyaga yetmagan. Bu haqda Oliy sud ma’lumotlarida keltirilgan.
Yanvar–iyun oylarida sudlar mazkur yo‘nalishda 2 480 nafar shaxsga doir 2 018 ta jinoyat ishini ko‘rib chiqqan. Shundan 1 215 ta ish bo‘yicha 1 624 nafar shaxsga nisbatan ayblov hukmi chiqarilgan.
Jabrlanuvchilarning yosh tarkibi quyidagicha:
- 18 yoshga to‘lmaganlar — 581 nafar;
- 18–30 yoshdagilar — 654 nafar;
- 31–60 yoshdagilar — 870 nafar;
- 60 yoshdan kattalar — 41 nafar.
Ayblov hukmi chiqarilgan shaxslarning esa 84 nafari voyaga yetmagan, 597 nafari 18–30 yoshda, 893 nafari 31–60 yoshda, 50 nafari 60 yoshdan katta bo‘lgan. Sudlanganlarning 1 165 nafari ishsiz ekani qayd etilgan.
Statistika faqat sudlar ko‘rib chiqqan jinoyat ishlariga taalluqli bo‘lib, mamlakatdagi ayollarga nisbatan barcha zo‘ravonlik va tazyiq holatlarining umumiy sonini ifodalamaydi.
