O‘zbekistonda kartasiz, faqat telefon raqami orqali pul o‘tkazish tizimi yo‘lga qo‘yiladi
Yangi joriy etilayotgan mexanizmga ko‘ra, pul o‘tkazmalari Tezkor to‘lovlar tizimi orqali real vaqt rejimida va tunsiz-kunsiz (24/7) amalga oshiriladi. Buning uchun bankning mobil ilovasida qabul qiluvchi shaxsning telefon raqami yoki maxsus bog‘lovchi kodini kiritish yetarli bo‘lib, tizim raqamga biriktirilgan bank hisobini o‘zi avtomatik tarzda aniqlab oladi.
To‘lov amaliyotini tasdiqlashdan avval foydalanuvchi ekranida mablag‘ni qabul qilib oluvchi shaxsning ism-familiyasi, xizmat ko‘rsatuvchi bank nomi, o‘tkazma summasi hamda ushlanadigan komissiya miqdori aniq ko‘rsatiladi. Bu esa xatoliklarning oldini olish va xavfsizlikni ta’minlashga xizmat qiladi.
Yangi xizmatdan foydalanish uchun telefon raqami oldindan bank hisobiga biriktirilgan bo‘lishi lozim. Bir bank doirasida bitta telefon raqamiga faqat bitta hisob raqamini bog‘lash mumkin bo‘lib, yangi hisob biriktirilganda avvalgisi avtomatik o‘chiriladi. Bir bankning o‘z mijozlari o‘rtasidagi o‘tkazmalar uchun ushbu Tezkor to‘lovlar tizimidan foydalanish talab etilmaydi.
