O‘zbekistonda ish izlayotganlar ko‘paydi
2026-yilning I choragida O‘zbekistonda faol rezyumelar soni 31,5 foizga oshib, 636 mingtaga yetdi. Markaziy bank ma’lum qiladiki, ish qidiruvchilar sonining tez o‘sishi mehnat bozoridagi raqobatni kuchaytirdi va bu o‘z navbatida ish haqlari oshishiga turtki bergan.
Chorak davomida iqtisodiyotda bandlik barqaror kengaydi va uning asosiy qismi xizmatlar (moliya, sug‘urta, professional, texnik va ma’muriy xizmatlar) sohasi hisobiga to‘g‘ri keldi. Sanoat va savdo sohalarida ham bandlik barqaror o‘sdi va unda asosiy ulush xususiy sektor hissasiga tushdi. Qishloq xo‘jaligida esa bandlik qisqarib, mehnat resurslari boshqa tarmoqlarga qayta taqsimlandi.
Vakansiyalar soni yillik hisobda yanvarda 4,5 foiz, fevralda 6,5 foizga kamaygan. Biroq mart oyida faollik tiklanib, 15,4 mingta bo‘sh ish o‘rni e’lon qilindi – bu 2025-yilning mos davriga nisbatan 9,8 foizga ko‘pdir. Ishchi kuchiga eng yuqori talab xizmatlar, chakana savdo, umumiy ovqatlanish va ishlab chiqarish sohalarida kuzatilgan.
Regulyator tahliliga ko‘ra, ishchi kuchi taklifining o‘sish sur’atlari mehnatga bo‘lgan talab o‘sishidan sezilarli darajada yuqori bo‘lib qolmoqda. Shunga qaramay, korxonalarda xodimlarni yollash bo‘yicha kutilmalar ijobiy saqlangan. 2025-yil yakunida mamlakatda ishsizlik darajasi 4,8 foizni tashkil etgan edi.
Tarmoqlarda mehnatga haq to‘lash barqaror o‘sdi. Eng yuqori o‘sish sur’atlari moliya, sug‘urta va transport xizmatlarida qayd etilgan bo‘lsa, chakana savdo va umumiy ovqatlanishda o‘sish nisbatan barqaror shakllandi. Joriy yilning I choragida o‘rtacha ish haqining nominal o‘sishi 17,4 foizni, inflyatsiyadan tashqari real o‘sishi esa 9,5 foizni tashkil qildi.
