O‘zbekistonda gidlarga malaka toifalarini berish tartibi belgilandi
2026-yil 1-dekabrdan O‘zbekistonda gidlar va gid-tarjimonlarga ixtiyoriy asosda malaka toifalari beriladi. Ularning malaka sertifikatlari esa cheklanmagan muddatga rasmiylashtiriladi. Bu hukumatning 4-sentabrdagi “O‘zbekiston Respublikasida ekskursiya xizmatlarini yanada takomillashtirish chora-tadbirlari to‘g‘risida”gi Hukumat qarorida nazarda tutilgan.
Qarorga ko‘ra, Turizm qo‘mitasi huzuridagi Turizmni rivojlantirish ilmiy-tadqiqot institutiga gidlarning xohishiga ko‘ra havaskor, ixtisoslashgan va professional malaka toifalarini berish vakolati yuklatiladi. So‘nggi ikki yil davomida gid sifatida ishlamagan shaxslar malaka imtihonini qayta topshirishi lozim bo‘ladi.
Hujjat bilan tasdiqlangan nizomda gidlar uchun to‘rtta malaka toifasi belgilangan:
* havaskor gid;
* ixtisoslashgan gid;
* professional gid;
* “oltin fond” gidi.
Toifa berishda talabgorning kasbiy bilimi va amaliy ko‘nikmalari, ekskursiyalarni tashkil etish hamda o‘tkazish mahorati, ekskursiya obyektlari haqidagi bilimlari baholanadi. Shuningdek, turistlar bilan muloqot madaniyati, xorijiy tillarni bilish darajasi va kasb etikasiga rioya qilishi hisobga olinadi.
Malaka toifasini olish ixtiyoriy bo‘lib, uning yo‘qligi belgilangan tartibda olingan malaka sertifikati asosida gidlik faoliyatini yuritish huquqini cheklamaydi.
