O‘zbekistonda boshpanasiz shaxslarga ID-karta va uy-joy topishda koʻmaklashiladi
Yangi belgilangan tartibga ko‘ra, uysiz qolgan fuqarolar Vaqtincha boshpana va ijtimoiy moslashuv markazlariga joylashtiriladi. U yerga shaxslar o‘z xohishi bilan murojaat qilishi yoki mahalla idoralari hamda profilaktika inspektorlari tomonidan aniqlanib olib kelinishi mumkin. Markazga qabul qilinganlar dastlab 20 kun muddatga joylashtirilib, ularga zarur maishiy sharoitlar yaratiladi va tibbiy ko‘rik tashkil etiladi.
Shuningdek, har bir fuqaro uchun alohida moslashuv rejasi tuzilib, ularning shaxsini tasdiqlovchi hujjatlarini (pasport yoki ID-karta) qayta tiklash, pensiya va nafaqalarini rasmiylashtirish hamda yaqin qarindoshlarini izlab topishda amaliy yordam beriladi. Bunga parallel ravishda mutasaddilar uysiz qolgan fuqarolarni ish bilan ta’minlash hamda doimiy turar joy masalasini hal etish choralarini ko‘radi.
Ushbu ijtimoiy ko‘mak jarayoni maxsus elektron tizim orqali monitoring qilib boriladi va ko‘rsatilgan xizmatlar samaradorligi bo‘yicha mas’ul xodimlarning javobgarligi belgilanadi. Hozirda respublika bo‘yicha 726 o‘ringa mo‘ljallangan 11 ta maxsus reabilitatsiya markazi faoliyat yuritmoqda.
