O‘zbekistonda bank kartalari soni 75,7 milliondan oshdi
O‘zbekistonda muomaladagi bank kartalari soni bir oyda qariyb 1,1 milliontaga ko‘paydi. 1-avgust holatiga mamlakatdagi bank kartalari soni 75 mln 686,9 mingtaga yetgan.
Markaziy bank ma’lumotlariga ko‘ra, 1-iyuldan 1-avgustgacha bo‘lgan davrda banklarning to‘lov infratuzilmasida ham o‘sish kuzatilgan.
Xususan:
- Bank kartalari — 1 mln 74 mingtaga oshib, 75 mln 686,9 mingtaga yetgan;
- To‘lov terminallari — 5 354 taga ko‘payib, 453 471 tani tashkil qilgan;
- Bankomat va infokiosklar — 331 taga oshib, 47 009 taga yetgan.
Banklar kesimida kartalar soni eng ko‘p Uzum Bankda — 216,9 mingta, Hamkorbankda — 188,2 mingta, Garant bankda — 142 mingta, Anor bankda — 127,7 mingta va Xalq bankida — 118 mingtaga ko‘paygan.
Ayrim banklarda esa kartalar soni kamaygan. Kapitalbankda 25 mingdan ortiq, Asakabankda 12,3 mingta va Orient Finans bankda 10,2 mingta kamayish qayd etilgan.
To‘lov terminallari soni bo‘yicha eng katta o‘sish Hamkorbankda — 1 710 ta va Ipoteka-bankda — 1 270 ta bo‘lgan. Shuningdek, O‘zSQBda 441 ta, Orient Finans bankda 344 ta va Garant bankda 295 ta yangi terminal o‘rnatilgan.
Bankomat va infokiosklar sonini eng ko‘p oshirgan bank esa O‘zmilliybank bo‘lib, bir oyda 113 ta yangi qurilma ishga tushirilgan.
Shuningdek, 2026-yil yanvar–iyul oylarida to‘lov terminallari orqali 387,35 trln so‘mlik mablag‘ o‘tkazilgan. Yanvar–iyun davriga nisbatan bu ko‘rsatkich qariyb 64,9 trln so‘mga ko‘p.
Avgust boshidagi ma’lumotlarga ko‘ra, terminallar orqali o‘tgan mablag‘ hajmi bo‘yicha Aloqabank — 41,1 trln so‘m, Milliy bank — 32,2 trln so‘m, TBC Bank — 25,2 trln so‘m va Hamkorbank — 22,6 trln so‘m bilan yuqori natijalarni qayd etgan.
