O‘zbekistonda anomal issiq chekinmoqda: harorat 30 darajagacha tushadi
O‘zbekistonda so‘nggi kunlardagi anomal issiq ob-havo chekinishni boshlamoqda. Mamlakatning shimoli-g‘arbiy hududlarida havo harorati pasayishni boshlagan bo‘lsa, ertadan e’tiboran bu jarayon barcha hududlarda kuzatiladi.
20-24-iyul kunlari respublika bo‘yicha asosan yog‘ingarchilik kutilmaydi. Faqat 21-iyulda Qoraqalpog‘istonda, 22-iyulda Farg‘ona vodiysida hamda tog‘li hududlarda qisqa muddatli yomg‘ir yog‘ib, momaqaldiroq bo‘lishi mumkin.
Bugun, 20-iyul kuni havo harorati 40–43 daraja, janubda 45–47 daraja, shimolda esa 34–39 darajani tashkil etadi. Ertadan e’tiboran haftaning oxirigacha harorat kechasi 20–25 darajagacha, kunduzi esa 32–37 darajagacha, ayrim joylarda 30 darajagacha pasayadi.
20—22-iyul kunlari respublikaning ba’zi joylarida shamol tezligi 13–18 m/s, ayrim hududlarda esa 20–22 m/s gacha kuchayishi mumkin.
Toshkent shahrida bugun kunduzi harorat 41–43 daraja bo‘ladi. Ertaga kunduzi 36–38 daraja, 22—24-iyul kunlari esa kechasi 20–23 daraja, kunduzi 31–34 darajagacha pasayadi. Shaharda shamol vaqti-vaqti bilan 12–15 m/s gacha kuchayib, chang-to‘zonlar kuzatilishi kutilmoqda.
