O‘zbekistonda 40 kunda 1,4 million tonna chiqindi utilizatsiya qilindi
Chiqindilarni boshqarish va sirkulyar iqtisodiyotni rivojlantirish agentligi tomonidan tozalik tadbirlarining uzluksizligini ta’minlash uchun har kuni 4,5 mingga yaqin maxsus texnika hamda 10 mingdan ziyod xodim jalb etilgan. Chiqindilarni boshqarish va sirkulyar iqtisodiyotni rivojlantirish agentligi tomonidan tuzilgan maxsus shtablar tun-u kun navbatchilikni yo‘lga qo‘yib, mamlakatdagi 8 150 ta mahalladan 7 674 tasini tozalash aksiyasi bilan to‘liq qamrab olgan. Texnika uzilishlarining oldini olish maqsadida 155 ta zaxira mashinasi taxt qilib qo‘yildi va aniqlangan nosozliklar tezkorlik bilan bartaraf etilgan.
Aksiya nafaqat ko‘chalarni tozalash, balki ekologik tartibni saqlashni ham o‘z ichiga olgan. Reydlar davomida chiqindilarni noqonuniy joylashtirish bo‘yicha 97 ta qoidabuzarlik aniqlanib, aybdorlarga 165,4 million so‘m jarima qo‘llanilgan.
Shuningdek, bayram kunlari gavjum bo‘ladigan bozorlar, parklar va yangi o‘quv yili oldidan maktab hamda bog‘chalar atrofida sanitariya nazorati kuchaytirilgan. Yig‘ilgan yog‘och va shox-shabba chiqindilari esa qayta ishlanib, organik o‘g‘it shakliga keltirilgan.
Aholi bilan qayta aloqani ta’minlash maqsadida tushgan 327 ta murojaatning aksariyati joyida hal etilgan. Bayram kunlaridagi intensiv navbatchilik va ko‘rilgan choralar evaziga respublika bo‘yicha sanitariya holati barqaror saqlanib, chiqindi olib chiqish xizmatida uzilishlarga yo‘l qo‘yilmagan.
