O‘zbekistonda 2030-yilgacha barcha talabalar yotoqxona bilan to‘liq ta’minlanadi
Vazirning ta’kidlashicha, so‘nggi 10 yilda respublika bo‘yicha 100 ming o‘rinli talabalar turar joyi barpo etilgan. Solishtirish uchun, bu ko‘rsatkichgacha bo‘lgan butun bir asr (100 yil) davomida jami 55 ming o‘rinli yotoqxona qurilgan edi. Hozirda viloyatlardan kelib kunduzgi bo‘limda tahsil olayotgan talabalarning kamida 20 foizi yotoqxona bilan ta’minlanmoqda.
Qolgan talabalar ijara xonadonlarida istiqomat qiladi hamda ularning ijara to‘lovining teng yarmi davlat tomonidan qoplab beriladi. Shu sababli hozirgi kunda talaba uchun yotoqxonada yashash ham, ijarada turish ham bir xil xarajatni tashkil etadi.
Shuningdek, talabalarni joylashtirish jarayonini shaffof qilish maqsadida maxsus onlayn platforma yo‘lga qo‘yilgan bo‘lib, arizalar 15-avgustdan qabul qilinishi boshlangan. Xonalarni ajratishda birinchi navbatda ijtimoiy himoyaga muhtoj, imkoniyati cheklangan va olis hududlardan kelgan yoshlarga ustuvorlik beriladi.
