O'zbekiston va Pokiston o'rtasida mahkumlarni topshirish bo'yicha Bitim ratifikatsiya qilindi
Senatning yigirmanchi yalpi majlisida O'zbekiston va Pokiston o'rtasida mahkumlarni topshirish to'g'risidagi Bitimni ratifikatsiya qilish haqidagi qonun ma'qullandi.
Bitimga ko'ra, ikki davlat ozodlikdan mahrum qilish jazosini o'tayotgan mahkumlarni qolgan jazo muddatini o'z fuqaroligiga ega bo'lgan davlat hududida o'tashi uchun topshirish bo'yicha hamkorlik qiladi.
Hujjatda mahkumni topshirish shartlari va rad etish asoslari, so'rov yuborish tartibi, jazoni ijro etish, tranzit olib o'tish hamda xarajatlarni qoplash masalalari belgilangan.
Senatorlar ta'kidladiki, qonunning qabul qilinishi xorijda jazo o'tayotgan O'zbekiston fuqarolarining huquq va qonuniy manfaatlarini himoya qilish, ularning ijtimoiy reabilitatsiyasi imkoniyatlarini kengaytirish hamda ikki davlat o'rtasidagi huquqiy hamkorlikni mustahkamlashga xizmat qiladi.
