O‘zbekiston va Ozarbayjon birinchi xonimlari Islom sivilizatsiyasi markaziga tashrif buyurdi
24-avgust kuni O‘zbekiston birinchi xonimi Ziroat Mirziyoyeva va Ozarbayjon birinchi xonimi Mehribon Aliyeva toshkent shahridagi Islom sivilizatsiya markaziga hamda “Oxun Guzar” shourumiga tashrif buyurdi.
Islom sivilizatsiya markazida ular “Islomgacha bo‘lgan sivilizatsiyalar” zali, Birinchi va Ikkinchi Renessans davrlariga bag‘ishlangan ekspozitsiyalar hamda “Yangi O‘zbekiston” zali bilan tanishdi. Shuningdek, O‘zbekiston va Ozarbayjon xalqlari o‘rtasidagi tarixiy va madaniy aloqalarni aks ettiruvchi eksponatlarni ko‘zdan kechirdi.
Tashrif davomida “Qur’on zali”ga ham borildi. Unda saqlanayotgan Usmon Mushafi VII asrga oid bo‘lib, Qur’onning bizgacha yetib kelgan eng qadimiy qo‘lyozmalaridan biri hisoblanadi. Noyob yodgorlik UNESCOning “Jahon xotirasi” xalqaro reyestriga kiritilgan.
Suhbat davomida O‘zbekiston va Ozarbayjon o‘rtasidagi gumanitar va madaniy aloqalarni yanada rivojlantirish muhimligi ta’kidlandi. Ikki xalqni umumiy tarix, madaniy an’analar va ma’naviy qadriyatlar bog‘lab turishi qayd etildi.
Shuningdek, ular “Oxun Guzar” shourumiga tashrif buyurdi. Bu yerda o‘zbek hunarmandchiligi an’analarini rivojlantirib, zamonaviy talqinda davom ettirayotgan mahalliy brendlar namoyish etilgan. Oliy martabali mehmonlar milliy naqshlar, ko‘p asrlik hunarmandchilik an’analari va o‘zbek xalqining madaniy qadriyatlari aks etgan mahalliy usta va dizaynerlarning mahsulotlari bilan tanishdi.
“Madaniy dastur doirasida O‘zbekistonning eng yorqin urf-odat va an’analari namoyish etildi. Inson hayotidagi eng muhim bosqichlardan biri bo‘lgan oila qurish mavzusiga alohida e’tibor qaratildi”, deyiladi xabarda.
.jpg&w=3840&q=75)
Ozarbayjonlik mehmonlarga kelin sarposini tayyorlash va so‘zana tikish bilan bog‘liq udumlar, to‘y marosimlari, kelinni kuyov xonadoniga kuzatish, “kelin salom”, “beshik to‘yi”, shuningdek, an’anaviy ona allasi namoyish etildi.
Madaniy dastur qardosh O‘zbekiston va Ozarbayjon xalqlarining urf-odatlari va qadriyatlaridagi mushtarak jihatlarni ham alohida namoyon etdi. Har ikki xalq hayotida oila, kattalarga hurmat, farzand tarbiyasi, mehmondo‘stlik hamda milliy an’analarni asrab-avaylash muhim o‘rin tutadi.
