O‘zbekiston mayiz eksporti bo‘yicha AQSH va Hindistonga yetib oldi
BMTning Comtrade bazasi ma’lumotlariga ko‘ra, O‘zbekiston global mayiz bozorida 7-o‘rinni egallab turibdi. Ushbu yo‘nalishda Yevropa va Janubiy Amerika mamlakatlarini ortda qoldirgan respublika AQSH (53,7 ming tonna) va Hindiston (55,6 ming tonna) kabi yirik yetkazib beruvchilarga yaqinlashib oldi.
Ro‘yxatda Turkiya 205,9 ming tonna natija bilan birinchi o‘rinni egallagan bo‘lsa, keyingi o‘rinlarni JAR va Xitoy band etgan.
Milliy statistika qo‘mitasi xabariga ko‘ra, eksport oqimi joriy yilda ham o‘sishda davom etmoqda. 2026-yilning yanvar-iyun oylarida O‘zbekiston dunyoning 57 ta davlatiga umumiy qiymati 60 million dollarga teng bo‘lgan 47,7 ming tonna mayiz sotdi. Bu ko‘rsatkich o‘tgan yilning mos davriga qaraganda 704,5 tonnaga ko‘proqdir.
O‘zbekiston mayizining asosiy xaridorlari qatorida qo‘shni va mintaqaviy davlatlar yetakchilik qilmoqda. Joriy yilning dastlabki 6 oyida eng ko‘p mahsulot Qozog‘istonga (15,2 ming tonna) jo‘natildi. Keyingi o‘rinlarni Xitoy, Rossiya va Turkiya egallagan. Shuningdek, o‘zbek mayizi Germaniya, BAA, Gruziya hamda Braziliya kabi uzoq xorij bozorlariga ham yetkazib berilmoqda.
