Ozarbayjonning eng yirik davlat banki “Davr Bank”ni sotib oldi
Ozarbayjon Prezidenti Ilhom Aliyevning Toshkentga amalga oshirgan davlat tashrifi doirasida ikki mamlakat yetakchilariga namoyish etilgan qo‘shma loyihalar taqdimotida ushbu yirik bitim yakunlangani e’lon qilindi.
Shuningdek, prezidentlar ishtirokida o‘tkazilgan marosimda rasman ishga tushirilgan uchta asosiy investitsion loyihadan biri aynan “Davr Bank” integratsiyasi bo‘lgan. Janubiy Kavkaz va Ozarbayjonning yetakchi moliyaviy muassasasi hisoblangan ABB ushbu qadam orqali O‘zbekiston bank sektoridagi faoliyatini boshladi.
Moliya bozoridagi ushbu kelishuv tafsilotlariga ko‘ra, Ozarbayjon davlat banki “Davr Bank”ning 51 foiz aksiyasini 100 million dollar evaziga xarid qilishi ko‘zda tutilgan edi. Yoz oylarida o‘tkazilgan muzokaralar va bank aksiyadorlarining roziligidan so‘ng, bitim huquqiy va amaliy jihatdan rasmiylashtirildi. Ozarbayjon tomoni mazkur loyihani amalga oshirishda qulay investitsion muhit va ko‘mak taqdim etgani uchun O‘zbekiston rahbariyati hamda Markaziy bankka minnatdorchilik bildirgan.
Ma’lumot uchun, 2001-yildan buyon faoliyat yuritib kelayotgan “Davr Bank” xususiy aksiyadorlik tijorat bankining ustav fondi 500 milliard so‘mni tashkil etadi va u shu kunga qadar jismoniy shaxslar muassisligida boshqarib kelingan. 1992-yilda tashkil etilgan Boku shahridagi ABB esa mintaqaning eng yirik davlat banki sanaladi. Mazkur bitim ikki davlat o‘rtasidagi bank-moliya hamkorligida mutlaqo yangi bosqichni boshlab berdi.
