OTMlarda 31 mingdan ortiq bo‘sh o‘rin uchun qo‘shimcha tanlov boshlandi
E’lon qilingan ro‘yxatga ko‘ra, kunduzgi, kechki hamda masofaviy ta’lim shakllari bo‘yicha OTMlar va fanlar majmuasi kesimida 31 mingdan ziyod bo‘sh o‘rin ajratilgan. Kirish imtihonlarida minimal 56,7 ball va undan yuqori natija ko‘rsatgan, ammo talabalikka tavsiya etilmagan abituriyentlar, shuningdek, ro‘yxatdan o‘tishning ikkinchi bosqichida yo‘nalish tanlamay qolgan fuqarolar ushbu qo‘shimcha tanlovda qatnashish huquqiga ega.
Bo‘sh o‘rinlarga da’vogarlik qilish uchun arizalarni qabul qilish 22-avgustdan start oldi va 28-avgust kuni soat 23:59 ga qadar davom etadi.
Abituriyentlar o‘zlari imtihon topshirgan fanlar majmuasi va ta’lim tili mos keladigan yo‘nalishlarni qayta tanlashlari lozim.
Tanlov natijalariga ko‘ra, nomzodlar to‘plagan ballar ketma-ketligi bo‘yicha vakant o‘rinlarga bazaviy to‘lov-kontrakt asosida talabalikka tavsiya etiladi. Jarayon yakunlangach, baholash agentligi tegishli qaydnomalarni shakllantirib, oliy ta’lim muassasalariga taqdim etadi.
