O‘quvchilarning darsdagi faolligi va ruhiy holatini SI nazorat qiladi. Toshkentda “Aqlli maktab” tizimi sinovdan o‘tkazilmoqda
Loyiha doirasida Olmazor tumanidagi 31 ta maktabning 250 ta xonasiga maxsus uskunalar o‘rnatilmoqda. Sergeli tumanida esa 9-11-sinflarning 345 ta xonasidan 177 tasiga zamonaviy kameralar qo‘yib bo‘lindi. Rejaga ko‘ra, avgust oyi oxiriga qadar barcha kameralar o‘rnatilib, tuman hokimligi qoshidagi Vaziyatlar markaziga ulanadi va yagona tizimga integratsiya qilinadi.
Keng imkoniyatli ushbu elektron tizim sun’iy intellekt yordamida o‘quvchilar davomatini avtomatik ravishda yuritadi hamda ularning dars jarayonidagi ishtirokini tahlil qiladi. Dastur o‘quvchilarning muayyan fanlarga bo‘lgan qiziqishini aniqlash, ularning ruhiy holatiga baho berish va o‘qituvchilarning pedagogik mahoratini nazorat qilish funksiyalariga ega. Shuningdek, maktab hududiga begona shaxslarning kirishini aniqlash orqali xavfsizlik choralari ham kuchaytiriladi.
Tumanlar mahalliy byudjeti hisobidan moliyalashtirilayotgan ushbu tashabbus Toshkent shahri hokimligi tomonidan ilgari surilgan. Olmazor va Sergeli tumanlaridagi tajriba kutilgan natijani bersa, “Aqlli maktab” loyihasi bosqichma-bosqich poytaxtdagi barcha umumta’lim muassasalariga joriy etilishi rejalashtirilgan.
