“Open budjet”da majburiy ovoz yig‘dirganlar “otni kallasiday” jarimaga tortiladi va loyiha jarayondan chetlatiladi
O‘zbekiston Davlat mehnat inspeksiyasi xodimlarni, xususan byudjet tashkilotlari ishchilarini “Tashabbusli budjet” (Open budjet) loyihasida majburiy ravishda ovoz berishga yoki ovoz yig‘ishga majburlash holatlarini mehnat qonunchiligining qo‘pol ravishda buzilishi deb baholadi. Mehnatga biron-bir shaklda ma’muriy tarzda majburlaganlik uchun keskin jazo choralari belgilangan.
Ma’muriy javobgarlik to‘g‘risidagi kodeksning 51-moddasiga binoan, xodimlarni majburiy ovoz yig‘ishga jalb etgan mansabdor shaxslarga bazaviy hisoblash miqdorining 50 baravaridan 100 baravarigacha miqdorda yirik jarima solinadi. Qonunbuzarlikka yo‘l qo‘ygan ish beruvchilar va mas’ullar belgilangan javobgarlikka tortilishi shart.
Bundan tashqari, majburiy ovoz yig‘ish holati tasdiqlangan taqdirda, tegishli loyiha “Tashabbusli budjet” jarayonidan butunlay chetlashtirilishi mumkin. Ish joyida bunday tazyiq va majburlashga duch kelgan fuqarolar Davlat mehnat inspeksiyasining 1176 qisqa raqamiga murojaat qilishlari so‘raladi.
Avvalroq “Open budjet” atrofidagi firibgarliklar yuzasidan rasmiy ogohlantirish berilgan edi.
