Omskdagi qurilishda yong‘in oqibatida 4 kishi halok bo‘ldi. Ulardan biri O‘zbekiston fuqarosi bo‘lib chiqdi
Rossiyaning Omsk shahrida 15-avgust kuni qurilayotgan ko‘p qavatli binoda yuz bergan yong‘in oqibatida halok bo‘lgan to‘rtinchi shaxs 2003-yilda tug‘ilgan O‘zbekiston fuqarosi ekani aniqlandi. Bu haqda TASS viloyat prokuraturasiga tayanib xabar berdi.
Ma’lum bo‘ldiki, yigit og‘ir ahvolda Omskdan Nijniy Novgoroddagi tibbiyot muassasasiga maxsus samolyotda olib ketilgan, biroq shifoxonada vafot etgan. Yong‘in oqibatida jami 11 kishi jabrlangan, ulardan uchtasi uyiga chiqarilgan. To‘rt kishi halok bo‘lgan: ulardan biri Qozog‘iston, ikki nafari Tojikiston va biri O‘zbekiston fuqarosi.
Yong‘in paytida qurilishda payvandlash ishlari olib borilgani va penopleks izolyatsiyasi yonib ketgani aytilmoqda. Hodisa yuzasidan Rossiya Jinoyat kodeksining mehnatni muhofaza qilish talablarini buzish bilan bog‘liq moddasi bo‘yicha jinoyat ishi qo‘zg‘atilgan.
