Olmaliqdagi bozorda katta yong‘in chiqdi. Jabrlanganlarga yetkazilgan zarar qoplanadimi?
Toshkent viloyati Favqulodda vaziyatlar boshqarmasiga 30-avgust kuni soat 05:18 da bozorda yong‘in chiqqani haqida xabar kelib tushgan. Hodisa joyiga jalb etilgan o‘t o‘chiruvchilarning tezkor harakatlari evaziga alanga soat 07:12 da batamom o‘chirildi. Birinchi ma’lumotlarga qaraganda, hodisa oqibatida hech kim tan jarohati olmagan va halok bo‘lmagan.
Hodisa joyiga Toshkent viloyati hokimi Zoyir Mirzayev boshchiligidagi mas’ul shaxslar zudlik bilan yetib borgan. Ular mol-mulki va savdo rastalariga zarar yetgan mahalliy tadbirkorlar bilan uchrashib, ularning muammolari hamda takliflarini tinglagan.
Hozirgi vaqtda FVB xodimlari va tegishli idoralar tomonidan yong‘inning kelib chiqish sabablari hamda tadbirkorlarga yetgan moddiy zarar miqdori aniqlanmoqda. Yangi tuzilgan Ishchi guruh jabrlangan tadbirkorlarga amaliy yordam ko‘rsatish va yetkazilgan zararni qoplash choralarini ko‘radi.
