Ohangaronda avtobus va Lacetti to‘qnashuvi oqibatida 3 kishi jarohatlandi
Toshkent viloyatining Ohangaron tumanida kecha, 2-sentyabr kuni Isuzu avtobusi va Lacetti avtomobili ishtirokida yo‘l-transport hodisasi sodir bo‘ldi. Oqibatida Lacetti haydovchisi va avtobusdagi ikki nafar yo‘lovchiga tibbiy yordam ko‘rsatilib, shifoxonaga olib borildi. Bu haqda Ichki ishlar bosh boshqarmasi xabar berdi.
Hodisa soat taxminan 18:30 larda Ohangaron tumani hududidan o‘tgan A-373 Toshkent — O‘sh avtomobil yo‘lida yuz bergan.
Ma’lum qilinishicha, 1964-yilda tug‘ilgan haydovchi Isuzu avtobusini boshqarib, yo‘lning ruxsat etilgan joyidan qayrilayotgan vaqtda qarama-qarshi yo‘nalishda harakatlanib kelayotgan, 1997-yilda tug‘ilgan fuqaro boshqaruvidagi Lacetti bilan to‘qnashgan.
Hodisa oqibatida Lacetti haydovchisi hamda avtobusdagi ikki nafar yo‘lovchiga birinchi tibbiy yordam ko‘rsatilib, Ohangaron tumani markaziy shifoxonasiga olib borilgan.
Hozirda holat yuzasidan Ohangaron tumani IIB tomonidan surishtiruv ishlari olib borilmoqda.
