Noqonuniy migratsiyani tashkil etganlik uchun 15 yil qamoq jazosi berilishi mumkin
O‘zbekistonda noqonuniy migratsiyani tashkil etish, unga rahbarlik qilish yoki ko‘maklashish uchun jinoiy javobgarlik belgilanishi taklif etilmoqda. Buning uchun Jinoyat kodeksiga yangi 223¹-modda kiritilmoqda.
Yangi tartibga ko‘ra, iqtisodiy manfaat ko‘rish maqsadida noqonuniy migratsiyani tashkil etish, shuningdek, transport yoki turar joy berish orqali shaxslarni belgilangan tartibni buzgan holda O‘zbekistonga olib kirish, davlat chegarasidan olib o‘tish, chet elga olib chiqish yoki mamlakat hududi orqali noqonuniy tranzitini tashkil etish 3 yildan 5 yilgacha ozodlikni cheklash yoki ozodlikdan mahrum qilish bilan jazolanadi.
Agar qilmish ko‘p miqdorda, bir guruh shaxslar tomonidan, mansabdor shaxs tomonidan, takroran, xavfli retsidivist yoki uyushgan guruh tomonidan sodir etilgan bo‘lsa, 5 yildan 10 yilgacha ozodlikdan mahrum qilish jazosi qo‘llanadi.
Juda ko‘p miqdorda sodir etilgan, inson hayoti yoki sog‘lig‘i uchun xavfli usuldan foydalanilgan yoxud og‘ir oqibatlarga olib kelgan holatlarda esa 10 yildan 15 yilgacha ozodlikdan mahrum qilish jazosi belgilanadi.
Shuningdek, Jinoyat-protsessual kodeksiga kiritilayotgan o‘zgartirish bilan mazkur jinoyat bo‘yicha dastlabki tergovni ichki ishlar organlari tergovchilari olib borishi belgilanmoqda.
Qonun rasmiy e’lon qilingan kundan e’tiboran kuchga kirishi ko‘zda tutilgan.
Mazkur qonun loyihasi muhokamasi 2026-yil 8-sentyabrga qadar davom etadi.
