NKMKning “Pistali” konida baxtsiz hodisa oqibatida ikki ishchi halok bo‘ldi
Navoiy kon-metallurgiya kombinatining “Pistali” konida 10-sentabr kuni yuz bergan baxtsiz hodisa oqibatida ikki nafar ishchi vafot etdi. Bu haqda NKMK matbuot xizmati ma’lum qildi.
Hodisa soat 15:00 lar atrofida “Qizilqum” kon boshqarmasi Avtomobil transporti boshqarmasiga qarashli “Pistali” 1-transport sexining foydalanilgan avtomobil shinalarini saqlash maydonida sodir bo‘lgan.
Ma’lum qilinishicha, quvur tashuvchi avtomashina tirkamasida shinomontaj ishlari olib borilayotgan vaqtda avtomobil shinasi portlagan. Oqibatda ikki nafar ishchi-xodim halok bo‘lgan.
Hozirda huquqni muhofaza qiluvchi organlar hodisa yuzasidan tergovga qadar tekshiruv olib bormoqda. Shuningdek, nazorat qiluvchi davlat tashkilotlari tomonidan maxsus tekshiruv o‘tkazilib, baxtsiz hodisaning kelib chiqish sabablari va tafsilotlari o‘rganilmoqda.
NKMK bunday hodisalarning oldini olish bo‘yicha zarur choralar ko‘rilayotganini bildirdi.
