Nijnekamskda dron hujumida halok bo‘lgan o‘zbekistonliklarning jasadi vatanga qaytarildi
Rossiyaning Tatariston Respublikasidagi Nijnekamsk shahrida dronlar hujumi oqibatida halok bo‘lgan 8 nafar O‘zbekiston fuqarosining jasadlari O‘zbekistonga olib kelindi. Bu haqda Tashqi qishlar vazirligining matbuot kotibi xabar berdi.
Hodisa 10-avgust kuni Nijnekamskdagi qator obyektlarga dronlar orqali hujum uyushtirilishi ortidan yuz bergan edi. Qurilish korxonasida ishlagan 8 nafar O‘zbekiston fuqarosi halok bo‘lgan, yana bir qator fuqarolar turli darajada tan jarohatlari bilan shifoxonaga yotqizilgan.
12-avgust kuni maxsus aviareys orqali halok bo‘lgan O‘zbekiston fuqarolarining jasadlari Vatanga olib kelindi. Mazkur masala, shuningdek, jabrlangan fuqarolarga yordam ko‘rsatish ishlari O‘zbekiston Tashqi ishlar vazirligi tomonidan Rossiya tomoni bilan hamkorlikda nazoratga olingan.
O‘zbekiston Prezidenti topshirig‘iga muvofiq tuzilgan Hukumat komissiyasi doirasida halok bo‘lganlarning jasadlarini Vatanga olib kelish, jabrlanganlarga yordam ko‘rsatish va ularning oila a’zolarini qo‘llab-quvvatlash bo‘yicha ishlar amalga oshirilgan.
Eslatib o‘tamiz, avvalroq Tatariston rahbari Rustam Minnixanov Nijnekamskdagi dron hujumi oqibatida halok bo‘lgan O‘zbekiston va Tojikiston fuqarolari yuzasidan Shavkat Mirziyoyev va Emomali Rahmonga hamdardlik bildirgan edi.
