“Nega Shomurodov turk futbolchisi sifatida o‘ynamaydi?” – Turkiyada legionerlar qoidasi tanqid qilindi
Turkiya Superligasining 3-turida “Istanbul Bashakshehir” va “Kashimpasha” 1:1 hisobida durang o‘ynadi. O‘zbekistonlik hujumchi Eldor Shomurodov 18-daqiqada gol urib, jamoasini oldinga olib chiqdi. Bu uning yangi mavsumdagi uchinchi o‘yinda urgan uchinchi goli bo‘ldi.
Shomurodov uchrashuv davomida faol harakat qildi. U 20-daqiqada jarima maydoni tashqarisidan yo‘llagan zarbasi himoyachiga tekkanidan so‘ng ustunga borib tegdi. 78-daqiqada esa hujumchi qanotdan uzatilgan to‘pga bosh bilan zarba berdi, biroq to‘p yana ustunga tegdi.
“Kashimpasha” 81-daqiqada Fousseniy Diabatening goli evaziga hisobni tenglashtirdi. Ushbu natijadan so‘ng “Bashakshehir” 4, “Kashimpasha” esa 5 ochkoga ega bo‘ldi.
Uchrashuvdan so‘ng “Kashimpasha” bosh murabbiyi Emre Belözo‘g‘lu Turkiyadagi xorijlik futbolchilar limitini tanqid qildi. U Shomurodovni misol qilib, ayrim futbolchilar turk futbolchisi maqomida o‘ynashi mumkin bo‘lishi kerakligini aytdi.
“Nega Shomurodov turk futbolchisi sifatida o‘ynamaydi? Biz bu geografiyadagi odamlarga yillar davomida homiylik qilib kelganmiz-ku”, — dedi murabbiy.
Belözo‘g‘lu “Kashimpasha” tarkibida 16 nafar xorijlik futbolchi borligini, amaldagi qoida sababli klub ulardan ikki nafari bilan xayrlashishga majbur bo‘layotganini ta’kidladi.
Murabbiy Kerem Demirbay xorijlik futbolchi sifatida qayd etilayotgani, “Galatasaroy” safidagi Ilkay Gyundog‘an esa turk futbolchisi maqomida o‘ynayotganini ham misol keltirdi.
“Kerem Demirbayni xorijlik sifatida o‘ynatyapman, ‘Galatasaroy’ esa Ilkayni turk futbolchisi sifatida o‘ynatyapti. Ikkalasining ham ota-onasi turk. Nega bunday jarayonni boshdan kechiryapmiz?” — dedi Belözo‘g‘lu.
Turkiyada legionerlar limiti qanday?
2026/27 yilgi mavsumda Turkiya Superligida 10+4 xorijlik futbolchi qoidasi amal qilmoqda. Klublar asosiy tarkib ro‘yxatiga ko‘pi bilan 14 nafar xorijlik futbolchini kiritishi mumkin. Ulardan 10 nafari uchun yosh cheklovi yo‘q, qolgan 4 nafari esa 2003-yil 1-yanvar yoki undan keyin tug‘ilgan bo‘lishi kerak.
14 nafardan ortiq xorijlik futbolchi bilan shartnoma tuzgan klublar ro‘yxatga kiritilmagan futbolchilarni Superliga uchrashuvlarida maydonga tushira olmaydi.
Belözo‘g‘lu federatsiyani ushbu qoidalarni qayta ko‘rib chiqishga chaqirib, amaldagi tartibni noto‘g‘ri qaror deb baholadi.
