Navoiyda ishga kiritish evaziga 1500 dollar olgan poliklinika mudiri o‘rinbosari ushlandi
Navoiy viloyati Nurota tumani G‘ozg‘on shahar tibbiyot birlashmasi Markaziy poliklinikasi mudiri o‘rinbosari fuqaroni hamshira lavozimiga ishga joylashtirib berish evaziga 1500 dollar olgan vaqtida ushlandi. Bu haqda Bosh prokuratura huzuridagi Departament xabar berdi.
Ma’lum qilinishicha, Departamentning Nurota tumani bo‘limi va boshqa huquqni muhofaza qiluvchi organlar xodimlari hamkorligida tezkor tadbir o‘tkazilgan.
Unda Markaziy poliklinika mudiri o‘rinbosari F.T. fuqaro O.A.ni G‘ozg‘on shahar tibbiyot birlashmasiga hamshira vazifasiga ishga joylashtirib berish evaziga 1500 AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (Firibgarlik) bilan jinoyat ishi qo‘zg‘atilib, tergov harakatlari olib borilmoqda.
