“Narxoz”ga o‘qishga kiritib qo’yish evaziga 5000 dollar pora olgan kafedra mudiri ushlandi
Toshkent kimyo-texnologiya instituti kafedrasi mudiri fuqaroning tanishini o‘qishga kiritib qo’yish uchun 5000 dollar olgan vaqtda qo’lga olindi. Bu haqda bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, o’tkazilgan tezkor tadbirda kafedra mudiri fuqaroning tanishini Rossiya Federatsiyasidagi universitetda goʻyoki bir yil davomida tahsil olganligi toʻgʻrisidagi hujjatlarni rasmiylashtirib berishni va’da qilgan. Shuningdek, uni keyinchalik Toshkent davlat iqtisodiyot universitetiga ikkinchi bosqichdan oʻqishga kiritib qoʻyish evaziga firibgarlik yoʻli bilan fuqarodan 5 ming AQSH dollari talab qilib, pulni olayotgan vaqtida ushlangan.
Shuningdek, departamentning Yakkasaroy tuman boʻlimi fuqaro boshqa bir shaxsni dastlab xususiy universitetning Samarqand filialiga oʻqishga kiritib, soʻngra oʻqishning ikkinchi bosqichidan Buxoro davlat universitetiga koʻchirib berish evaziga 10 ming AQSH dollarini firibgarlik yoʻli bilan olgan vaqtida ashyoviy dalillar bilan ushlangan.
Hozirda ikkala holat uchun tergov harakatlari davom etmoqda
