Narendra Modi O‘zbekistonga to‘rtinchi bor kelmoqda
Hindiston Tashqi ishlar vazirligi xabariga ko‘ra, bu Modining O‘zbekistonga to‘rtinchi tashrifi bo‘ladi. Toshkentda bo‘lib o‘tadigan oliy darajadagi muzokaralarda ikki mamlakat o‘rtasidagi strategik sheriklikni chuqurlashtirish, tovar ayirboshlash hajmini oshirish, mudofaa salohiyatini mustahkamlash, raqamlashtirish, energetika va sog‘liqni saqlash yo‘nalishlaridagi aloqalarni kengaytirish masalalari ko‘rib chiqiladi.
Tomonlar, shuningdek, zamonaviy sanoat uchun o‘ta muhim hisoblangan kritik minerallarni qazib olish va qayta ishlash hamda kosmos va yuqori texnologiyalar sohasidagi sheriklikni yangi bosqichga olib chiqishni maqsad qilgan. Tashrif dasturidan madaniy-gumanitar sohalardagi aloqalarni mustahkamlash ham o‘rin olgan.
Narendra Modi tashrif davomida Toshkentdagi yetakchi universitetlardan birida bo‘ladi, Lal Bahodir Shastri yodgorligiga gul qo‘yadi va Toshkent davlat sharqshunoslik universiteti huzuridagi Mahatma Gandi markazi faoliyati bilan tanishadi. Tashrif yakunlangach, Hindiston Bosh vaziri Qirg‘izistonga jo‘nab ketadi va u yerda SHHT sammitida ishtirok etadi.
